Prodhimi gjerman i veturave shënon rënien më të thellë në 23 vjet

Prodhimi gjerman i veturave ra në nivelin më të ulët në gati një çerek shekulli, ndërsa ekonomia më e madhe e Evropës vuan pasojat e një lufte tregtare botërore. Prodhuesit e automjeteve përfshirë Volkswagen, BMW dhe Daimler prodhuan 4.66 milionë automjete në fabrikat gjermane vitin e kaluar, prodhimi më i dobët që nga viti 1996. Autoritetet përkatëse që publikuan shifrat, shprehen se ulja prej 9 për qind erdhi si rezultat i zvogëlimit të kërkesës në tregjet ndërkombëtare.

Në fakt duket se industria në fjalë po kalon një nga periudhat më të vështira. Madje parashikimet janë edhe më negative në një kohë kur mendohet që dërgesat botërore të makinave të zbresin në 78.9 milionë automjete nga 80.1 milionë në vitin 2019.

Historikisht Gjermania njihet si një nga qendrat më të mëdha prodhuese botërore në industrinë e makinerive, por shqetësimet e ndotjes, konfliktet tregtare dhe ngadalësimi i ritmit të ekonomive kanë ndikuar shumë në rënien e kërkesës.

Daimler, Volkswagen dhe furnizuesi për pjesë makinash Continental AG po ulin më tej prodhimin, si rruga e vetme për të ulur kostot. Në të njëjtën kohë, industria duhet të shpenzojë miliarda euro për të zhvilluar automjete ekologjike, me tipare vetë-drejtuese, jo vetëm për çështje mjedisore, por qoftë edhe për të kundërshtuar shfaqjen e shërbimeve të udhëtimit si Uber Technologies, i cili ka një vlerë tregu ekuivalente me Daimler.

Gjermania është veçanërisht e ekspozuar ndaj kërkesave për automjete më ekologjike, pasi markat si BMW, Porsche dhe Audi përqendrohen në fuqi dhe performancë. Ndaj kjo i bën automobilistët e vendit më të ekspozuar për të investuar në një tjetër lloj makine që deri tani nuk e kishin prodhuar, modelin elektrik.

Vitin e kaluar, tregu i brendshëm i automjeteve të Gjermanisë u rrit për 5 për qind, pasi blerësit regjistruan 3.6 milionë makina të reja, sidoqoftë, organi i industrisë ka thënë që tregu ka të ngjarë të kontraktohet këtë vit dhe ka parashikuar që humbjet e vendeve të punës do të përshpejtohen me kalimin në makina elektrike, të cilat kërkojnë më pak pjesë dhe më pak punë për tu montuar.