Tesla ka pranuar afro 150 mijë porosi për makinën Cybertruck, ka thënë drejtori i përgjithshëm Elon Musk, megjithëse ka pasur një prezantim të dobët.

Musk ka mbetur i turpëruar në skenë, kur të dy xhamat e makinës së re që mbushet me rrymë janë thyer, megjithëse thuhet se nuk shpohen as nga plumbi.

Aksionet e Teslas kanë rënë për 6.1 për qind, shkaku i kësaj ngjarjeje që ndodhi të enjten, si dhe disa vlerësimeve aspak të mira. Dizajni me kënde i makinës pickup është përshëndetur me duartrokitje, por edhe me mjaft habi.

“146k porosi për Cybertruck deri më tani, 42 për qind kërkojnë motor dysh, 41 për qind me tri dhe 17 për qind me një motor”, ka shkruar sot Musk në Twitter.

Sipas tij, kërkesat kanë ardhur, përkundër që “nuk është bërë asnjë reklamë apo miratimi të paguar”. Asnjë datë nuk është dhënë, se kur mund të lansohet Tesla Cybertruck, por nuk pritet të jetë gati para vitit 2021.

Makina me dukje industriale, e ndërtuar nga metali që nuk ndryshket, thuhet se brenda tre sekondave, mund të arrijë nga zero deri në 100 kilometra në orë.